Қорқыт Ата атындағы ҚУ-нің Студенттер сарайының іргетасы 1971 жылы қаланған. Алғашында Н.В. Гоголь атындағы педагогикалық институттың акт залы есебінде пайдаланылып, кейін сахналық қондырғылар орнатылып, кинофильмдер көрсетілген мәдени ошақ. 

2001-2002 жылдары бұл ғимаратқа күрделі жөндеу жұмыстары жүргізілді. Заман талабына сай жабдықталған үлкен мәдени орталықта 460 орындық көрермен залы, 100 адамға шақталған фойе залы, әуен студиясы т.б. бар. Бүгінде заманауи үлгіде жабдықталған нысанда оннан аса қызметкерлер жұмыс жасайды.

Студенттер сарайы Қызылорда облысындағы үлкен мәдени орталықтардың біріне айналды. Ғимаратта түрлі деңгейдегі іс-шаралар ұйымдастырылумен қатар республикаға танымал өнер адамдарының кештері өткізіледі. Ең бастысы жастардың мәдени өмірін жандандыру үшін Студенттер сарайында бар жағдай жасалған. Жыл сайын жалауын көтеретін «Студенттік көктем» фестивалі, «КТК» ойындары тұрақты түрде өткізіледі. Сондай-ақ, аталмыш мәдени ошақта студенттердің шеберлігін шыңдау және театр өнеріне баулу мақсатында 2010 жылдың 10 сәуірінде Қызылорда облыстық әкімдігі, облыстық «Азаматтық Альянс» қауымдастығы, «Игілік» корпоративтік қорының қаржылық қолдауымен үш жақты келісім аясында «Жауқазын» студенттер театры құрылды. Театр бүгінде Р.Мұқанованың «Қыз жылаған», К.Рахмановтың «Келін», «Ол жалғыз – біз екеуміз» пьесаларымен көпшілікке танылды.
Сонымен бірге университеттің профессор-оқытушыларынан құралған «Коркыт. кz» вокалды аспаптар ансамблі жұмыс жасайды. Ансамбль репертуарында Қазақстан композиторларының «Ана туралы баллада», «Елім менің», «Шофер әні» сияқты шығармалары бар.

Мекен жайымыз: Жақаева көшесі 75
Tел: 27 67 74